اخلاقی صفات

اللہ کے نبی صلی اللہ علیہ و سلم اخلاقی اعتبار سے سب سے مکمل انسان تھے اور تمام اخلاق و محاسن، جیسے اچھی بات کرنا، دوسروں کا بھلا کرنا، ہنس کر ملنا، اذیت دینے سے بچنا اور کوئی اذیت دے تو صبر کرنا وغیرہ میں سب سے آگے تھے۔

1. اخلاق میں اللہ کے نبی صلی اللہ علیہ و سلم کا مکمل ہونا۔
2. اللہ کے نبی صلی اللہ علیہ و سلم حسن اخلاق کے معاملے میں مکمل نمونہ اور آئیڈیل ہیں۔
3. اللہ کے نبی صلی اللہ علیہ و سلم کے نقش قدم پر چلتے ہوئے اپنے آپ کو اچھے اخلاق سے مزین کرنے کی ترغیب۔

صحيح البخاري (8/ 45) (6203). صحيح مسلم (4/ 1805) (2310). بهجة الناظرين شرح رياض الصالحين، لسليم الهلالي (1/ 670). نزهة المتقين شرح رياض الصالحين، لمصطفى الخِن وغيره (1/ 524). كنوز رياض الصالحين، لمجموعة من الباحثين (9/ 57). شرح رياض الصالحين، لابن عثيمين (3/ 556).

ام المؤمنین عائشہ رضی اللہ عنہا سے اللہ کے رسول صلی اللہ علیہ و سلم کے اخلاق کے بارے میں پوچھا گیا، تو انھوں نے نہایت ہی جامع الفاظ میں جواب دیا۔ انھوں نے سوال کرنے والے کو قرآن کا حوالہ دیا، جو ہر اعتبار سے ایک مکمل کتاب ہے۔ انھوں نے بتایا کہ اللہ کے نبی صلی اللہ علیہ و سلم کے اخلاق قرآن کا چلتا پھرتا نمونہ تھے۔ جن چیزوں کا قرآن نے حکم دیا ان پر عمل کرتے اور جن چیزوں سے قرآن نے روکا ان سے دور رہتے تھے۔ اس طرح آپ کے اخلاق کی جو تصویر بنتی ہے، وہ ہے قرآن پر عمل کرنا، اس کے بیان کردہ حدود کے دائرے میں رہنا اور اس کی پیش کردہ مثالوں اور قصوں سے نصیحت حاصل کرنا۔

1. اس میں اللہ کے نبی صلی اللہ علیہ و سلم کے نقش قدم پر چلتے ہوئے قرآن میں پیش کردہ اخلاق کو اپنی شخصیت میں اتارنے کی ترغیب دی گئی ہے۔
2. اللہ کے رسول صلی اللہ علیہ و سلم کے اخلاق کی تعریف اور یہ کہ آپ کے اخلاق وحی کے سرچشمے سے لیے گئے تھے۔
3. قرآن تمام اعلی اخلاق کا سرچشمہ ہے۔
4. اسلامی اخلاق کے اندر پورا دین یعنی تمام اوامر کی انجام دہی اور نواہی سے اجتناب داخل ہے۔

صحيح مسلم (1/ 512) (746). بهجة الناظرين شرح رياض الصالحين، لسليم الهلالي (3/ 308). شرح رياض الصالحين، لابن عثيمين (6/ 660). نزهة المتقين شرح رياض الصالحين، لمصطفى الخن وغيره (2/ 1253). كنوز رياض الصالحين، لمجموعة من الباحثين (21/ 556).

نبی ﷺ نے دعا فرمائی: اے اللہ! میں بھی ایک بشر ہی ہوں، مجھے بھی اسی طرح غصہ آجاتا ہے جس طرح انسانوں کو آتا ہے۔ لہذا جس کسی مومن کو میں نے تکلیف دی ہو، یا اسے برا بھلا کہا ہو، یا اس پر لعنت بھیجی ہو، یا اسے مارا ہو، تو اس عمل کو اس کے لیے پاکیزگی، قربت، گناہوں سے صفائی، کفارہ اور ایسی رحمت بنا دے جس کے سبب تو اس پر رحم فرمائے۔

1. اللہ کے نبی ﷺ کا عظیم اخلاق۔
2. ابن حجر کہتے ہیں: اس حدیث سے اپنی امت پر آپ ﷺ کی کمالِ شفقت، آپ کا حسنِ اخلاق اور آپ کی ذات کا کرم معلوم ہوتا ہے، کہ آپ ﷺ نے آپ سے سرزد ہونے والے فعل کے جواب میں دل جوئی اور تکریم کا قصد فرمایا۔
3. نووی کہتے ہیں: اگر یہ سوال کیا جائے کہ آپ ﷺ کسی ایسے شخص کو کیسے بد دعا دے سکتے ہیں، یا اسے برا بھلا کہہ سکتے ہیں، یا اس پر لعنت بھیج سکتے ہیں جو اس کا اہل نہ ہو؟ تو اس کا جواب وہی ہے جو علماء نے دیا ہے، اور اس کی دو توجیہات ہیں: پہلی توجیہ یہ ہے کہ اس سے مراد یہ ہے کہ وہ شخص حقیقت میں اللہ تعالی کے نزدیک اس کا اہل نہیں ہوتا، لیکن بظاہر وہ اس کا مستحق ہوتا ہے۔ چنانچہ نبی ﷺ کے سامنے کسی شرعی علامت کی بنا پر اس کا مستحق ہونا ظاہر ہو جاتا ہے، جب کہ درحقیقت وہ اس کا اہل نہیں ہوتا۔ جبکہ نبی ﷺ کو ظاہر پر حکم لگانے کا حکم دیا گیا ہے، اور باطنی امور اللہ کے سپرد ہیں۔ دوسری توجیہ یہ ہے کہ آپ ﷺ کا کسی کو برا بھلا کہنا یا بد دعا دینا وغیرہ مقصود نہیں ہوتا تھا، بلکہ یہ عربوں کی عادت کے مطابق تکیہ کلام کے طور پر بغیر کسی نیت کے ہوتا تھا، جیسے ان کا کہنا: تَرِبَت يمينك (تیرے ہاتھ خاک آلود ہوں)، عَقْرَى حَلْقَى (تو ہلاک ہو جا)۔ اور اسی حدیث میں آیا ہے: (لا كبرت سنك) (تیری عمر دراز نہ ہو)، اور حضرت معاویہ رضی اللہ عنہ کی حدیث میں ہے: (لا أشبع الله بطنك) (اللہ تیرا پیٹ نہ بھرے) وغیرہ۔ ان کلمات سے ان کا مقصد حقیقی بد دعا دینا نہیں ہوتا تھا۔ نبی ﷺ کو اندیشہ ہوا کہ کہیں ان میں سے کوئی بات قبولیت کی گھڑی سے موافق نہ ہو جائے، چنانچہ آپ ﷺ نے اپنے رب سبحانہ وتعالی سے سوال کیا اور درخواست کی کہ وہ اسے رحمت، کفارہ، قربت کا ذریعہ، پاکیزگی اور اجر بنا دے۔ ایسا آپ ﷺ سے کبھی کبھار ہی ہوتا تھا، اور نبی ﷺ نہ تو فحش گو تھے، نہ جان بوجھ کر فحش کلامی کرنے والے تھے، نہ بہت زیادہ لعنت کرنے والے تھے اور نہ ہی اپنی ذات کے لیے بدلہ لینے والے تھے۔

صحيح البخاري (8/ 77) (6361). صحيح مسلم (4/ 2007) (2601). عمدة القاري شرح صحيح البخاري (22/ 310). إرشاد الساري لشرح صحيح البخاري (9/ 207).