Al-A'raaf
Hii ni tarjama ya tafsiri ya as-Saʿdī kama IslamHouse.com inavyoichapisha katika saadi.islamenc.com, iliyosomwa kutoka kurasa za tovuti hiyo. Tovuti haisemi ni nani aliyeitafsiri kwa lugha nyingine wala inafuata toleo gani lililochapishwa, na haitaji masharti ya kuchukua matini yake, kwa hiyo haki ya kuionyesha haijathibitishwa. Hakuna aliyeilinganisha na kitabu kilichochapishwa, na hakuna mwanazuoni aliyeihakiki. Kila kifungu kipo kando ya aya inazozifafanua, ambazo ni matini ya Qur’ani ya Tanzil, inavyoonekana huko; aya ambayo tovuti haitoi ufafanuzi wake yenyewe inakaa pamoja na kifungu kilichotangulia, na faharasa inataja kila aya ya aina hiyo. Sabīl haikuandika wala kutafsiri kwa lugha nyingine chochote kati yake.
Maandishi kutokasaadi.islamenc.comIslamHouse.comnone stated (the site names no licence and no terms for taking its text)ilichukuliwa 2026-10-22
يَـٰبَنِىٓ ءَادَمَ خُذُوا۟ زِينَتَكُمْ عِندَ كُلِّ مَسْجِدٍ وَكُلُوا۟ وَٱشْرَبُوا۟ وَلَا تُسْرِفُوٓا۟ ۚ إِنَّهُۥ لَا يُحِبُّ ٱلْمُسْرِفِينَ 31
{31} Yeye Mtukufu anasema baada ya kuwateremshia wanadamu vazi la kufunika uchi wao na pambo: "Enyi wanadamu! Chukueni pambo lenu kwenye msikiti." Yaani, funikeni uchi wenu wakati wa kuswali swala zote, za faradhi zake na za Sunnah zake. Kwa maana, kuufunika ni pambo la mwili, kama vile kuudhihirisha pia kunauacha mwili ukiwa mbaya na ukiwa umeharibika. Na inawezekana kwamba kinachomaanishwa na kujipamba hapa ni chochote zaidi ya hapo, kama vile mavazi safi na mazuri. Kwa hivyo, katika hili kuna amri ya kufunika uchi wakati wa sala, na kutumia mapambo mazuri ndani yake, na kusafika kwa kinachositiri kutokana na uchafu na najisi. Kisha akasema, "Na kuleni na kunyweni;" yaani, katika yale mazuri aliyowaruzuku Mwenyezi Mungu, "wala msipitilize" katika hayo. Na israfu ima ni kwa kuzidi kiasi kinachotosha na ulafi katika vyakula kwa namna inayodhuru mwili, au kwa kuzidisha anasa na ubadhirifu katika vyakula, na vinywaji, na mavazi, au kwa kupindukia ya halali hadi kwenye haramu. "Hakika Yeye hawapendi wapitilizao;" kwa maana, Mwenyezi Mungu anachukia upitilizaji, na unadhuru mwili wa mtu, na maisha yake, kiasi kwamba hali hiyo inaweza kumpelekea kushindwa kufanya yale yanachowajibika juu yake ya matumizi. Kwa hivyo, katika Aya hii tukufu, kuna amri ya kula na kunywa, na katazo la kuyaacha hayo na kutopitiliza ndani yake.