Ar-Room
Kani waa tarjumaad tafsiirka as-Saʿdī sida IslamHouse.com ugu daabacdo saadi.islamenc.com, oo laga akhriyay bogagga goobtaas. Goobtu ma sheegayso cidda tarjuntay ama daabacaadda la daabacay ee ay raacayso, mana sheegayso shuruudo qaadashada qoraalkeeda ah, sidaas darteed xaqa muujinteeda lama xaqiijin. Qofna ma barbardhigin buug la daabacay, aqoonyahanna ma dib u eegin. Qayb kasta waxay ag taagan tahay aayadaha ay ka hadlayso, kuwaas oo ah qoraalka Quraanka ee Tanzil, sida uu ugu yaal halkaas; aayad goobtu aanay faallo u gaar ah ka bixin waxay la taagan tahay qaybta ka horraysa, tusmaduna waxay magacaabaysaa aayad kasta oo caynkaas ah. Sabīl wax ka mid ah ma qorin, mana tarjumin.
Qoraalka waxaa laga helaysaadi.islamenc.comIslamHouse.comnone stated (the site names no licence and no terms for taking its text)la qaaday 2026-10-22
مِنَ ٱلَّذِينَ فَرَّقُوا۟ دِينَهُمْ وَكَانُوا۟ شِيَعًا ۖ كُلُّ حِزْبٍۭ بِمَا لَدَيْهِمْ فَرِحُونَ 32
{32} Kisha akataja hali ya washirikina na kuonyesha uduni wake na ubaya wake. Akasema, "Katika wale ambao kwamba wameigawanya dini yao," ijapokuwa Dini ni moja, ambayo ni kumkusudia Mwenyezi Mungu peke yake katika ibada. Na washirikina hawa waliigawanya: miongoni mwao wapo wanaoabudu masanamu, na miongoni mwao wapo wanaoabudu jua na mwezi, na miongoni mwao wapo wanaoabudu mawalii (watu walio karibu na Mwenyezi Mungu) na watu wema, na miongoni mwao wapo Mayahudi, na miongoni mwao wapo Wakristo. Na ndiyo maana akasema, "Na wakawa makundi makundi." Yaani, kila kundi miongoni mwa washirikina wakapotea na wakawa washabiki katika kuunga mkono batili waliyo nayo, na kuwapinga wengineo na kuwapiga vita. "Kila kikundi kinafurahia kilicho nacho" cha elimu mbalimbali iliyo kinyume na elimu ya Mitume na kwayo wanajihukumu wenyewe kuwa hiyo ndiyo haki na kwamba wengineo wako katika batili. Na katika hilo kuna hatadharisho kwa Waislamu dhidi ya kutawanyika na kutengana makundi makundi, kila kundi likawa linatetea yale waliyo nayo ya haki na batili, kwa hivyo wakawa wamefanana na washirikina katika kugawanyika kwao. Bali Dini ni moja, Mtume ni mmoja, na Mwenyezi Mungu ni mmoja, na katika mambo mengi ya kidini kuna maafikiano baina ya wanachuoni na maimamu, na udugu wa kiimani ulikwisha wekwa na Mwenyezi Mungu na akaufunga vyema kabisa. Basi kwa nini yote haya yanafutwa na unajengwa mgawanyiko na fitina baina ya Waislamu juu ya mambo yaliyofichikana au masuala ya kimatawi yenye utata ambayo kwayo wao kwa wao wanaonana kwamba kila mmoja wao amepotea, na wanajitofautisha baadi yao kutoka kwa wengineo? Je, huu si isipokuwa uchochezi mkubwa wa Shetani na malengo yake makubwa zaidi ambayo kwayo anawapangia njama Waislamu? Je, kujitahidi kuunganisha neno lao na kuondoa tofauti hizi zilizo baina yao zilizojengeka juu ya msingi huo batili, si isipokuwa ndiyo jihadi bora zaidi katika njia ya Mwenyezi Mungu na matendo bora zaidi yanayomuweka mtu karibu na Mwenyezi Mungu? Na pale Mwenyezi Mungu Mtukufu alipoamuru kutubia kwake, na kukawa kutubia huko ni kule kwa hiari, ambako kunakuwa katika hali ya shida, na urahisi, na wingi na dhiki, akataja kutubia kwa kulazimishwa ambako hutokea mtu isipokuwa wakati anapokuwa katika shida na dhiki. Na pindi dhiki hiyo inapomuondokea, anaitupa nyuma ya mgongo wake, lakini toba hii hainufaishi kitu. Akasema: