Fussilat

وَمَنْ أَحْسَنُ قَوْلًا مِّمَّن دَعَآ إِلَى ٱللَّهِ وَعَمِلَ صَـٰلِحًا وَقَالَ إِنَّنِى مِنَ ٱلْمُسْلِمِينَ 33

{33} Hii ni mbinu ya kuuliza swali lenye maana ya kukanusha ambako tayari kunajulikana. Yaani, hakuna "aliyebora zaidi katika usemi," mbinu na hali "kuliko aitaye kwa Mwenyezi Mungu" kwa kuwafundisha wasiojua na kuwapa mawaidha walioghafilika na wanaopeana haki mgongo, na kujadiliana na wana batili kwa kuwaamrisha kumwabudu Mwenyezi Mungu kwa namna zote, kuhimiza juu ya hilo, na kulifanya kuwa zuri iwezekanavyo, na kukemea yale aliyoharamisha Mwenyezi Mungu, na kuyafanya kuwa mabaya kwa kila njia inayolazimu yaachwe, hasa kulingania kwenye msingi wa dini ya Kiislamu na kuifanya kuwa nzuri sana, na kujadiliana na maadui zake kwa njia iliyobora zaidi, na kukataza yale yanayoupinga, kama vile ukafiri na ushirikina, na kuamrisha mema na kukataza maovu. Katika kulingania kwa Mwenyezi Mungu ni kuwafanya waja wake kumpenda kwa kutaja maelezo ya kina ya neema zake, upana wa wema wake, ukamilifu wa rehema yake na kutaja sifa za ukamilifu wake na utukufu wake. Katika kulingania kwa Mwenyezi Mungu ni kuhimiza kutafuta elimu na uwongofu kutoka katika Kitabu cha Mwenyezi Mungu na Sunna za Mtume wake, na kuhimiza kufanya hivyo kwa kila njia inayofikisha kwa hilo. Na katika kufanya hivyo, ni kuhimiza juu ya maadili mema, kuwa mwema kwa viumbe wote, kumlipa mkosaji kwa uzuri na kuamrisha kuunga jamaa za mtu na kuwafanyia wema wazazi. Na katika kufanya hivyo, ni kuwaaidhi watu wote kwa ujumla katika misimu, matukio na misiba mbalimbali kwa njia inayofailia hali hizo, na mambo mengineyo ambayo hayana kikomo, kama vile kulingania kwenye heri yote na kuhofisha dhidi ya maovu yote. Kisha Mwenyezi Mungu Mtukufu akasema: "na akatenda mema." Yaani, pamoja na kulingania kwake viumbe kwa Mwenyezi Mungu, yeye mwenyewe aliharakisha kutekeleza amri ya Mwenyezi Mungu kwa kutenda mema yanayomridhisha Mola wake Mlezi. "Na akasema: 'Hakika mimi ni katika Waislamu.'" Yaani, wale wanaotii amri yake, wanaotembea katika njia yake. Na daraja hii iliyo kamili zaidi ni ya Wakweli waliofanya matendo ya kujikamilisha wenyewe na kuwakamilisha wengine na wakapata urithi kamili kutoka kwa Mitume. Kadhalika, miongoni mwa watu waovu zaidi katika usemi ni wale wanaolingania upotofu na wakafuata njia zake. Baina ya daraja mbili hizi - zinazotofautiana, ambazo moja yake iliinuka juu zaidi ya vyote vilivyo juu, nayo nyingine ikateremka chini zaidi kuliko vyote vilivyo chini - kuna daraja ambazo hakuna azijuaye isipokuwa Mwenyezi Mungu, na zote zinakaliwa na viumbe, na kila mmoja wao ana daraja mbali mbali kutokana na yale waliyoyatenda. Na Mola wako Mlezi si mwenye kughafilika mbali na yale wanayoyatenda.