Al-Anfaal

وَمَا كَانَ صَلَاتُهُمْ عِندَ ٱلْبَيْتِ إِلَّا مُكَآءً وَتَصْدِيَةً ۚ فَذُوقُوا۟ ٱلْعَذَابَ بِمَا كُنتُمْ تَكْفُرُونَ ۳۵

{35} Inamaanisha kwamba Mwenyezi Mungu Mtukufu aliifanya Nyumba yake Takatifu ili kuisimamisha ndani yake dini yake na kumwepekesha katika ibada humo. Basi Waumini ndio waliofanya jambo hili, na ama washirikina hawa ambao wanaizuilia, basi hakukuwa kuswali kwao ndani yake ambako ndiko aina kubwa zaidi ya ibada zote "isipokuwa ni kupiga miunzi na makofi;" ambayo ni matendo ya kijahiliya (zama za ujinga), ambao hawana katika mioyo yao kumtukuza Mola wao Mlezi, wala kujua haki zake, wala kupaheshimu mahali bora zaidi na patukufu pake zaidi. Kwa hivyo ikiwa hii ndiyo swala yao ndani yake, basi vipi ibada zinginezo? Basi ni kwa kitu gani walikuwa ndio wanaoistahiki zaidi nyumba hii kuliko Waumini, ambao wao hunyenyekea katika sala zao, na ambao huyapa mgongo mambo ya upuuzi?... hadi mwisho wa yale aliyowaelezea kwayo Mwenyezi Mungu miongoni mwa sifa njema na matendo yaliyo sawa. Na hakuna shaka yoyote kwamba Mwenyezi Mungu aliwarithisha Nyumba Yake Tukufu na akawawezesha wao juu yake, na akawaambia baada ya kuwawezesha ndani yake: "Enyi mlioamini! Hakika washirikina ni najisi, kwa hivyo wasiukaribie Msikiti Mtakatifu baada ya mwaka wao huu." Na hapa akasema: "Basi onjeni adhabu kwa yale mliyokuwa mkiyakufuru."