An-Nisaa

وَإِنَّ مِنكُمْ لَمَن لَّيُبَطِّئَنَّ فَإِنْ أَصَـٰبَتْكُم مُّصِيبَةٌ قَالَ قَدْ أَنْعَمَ ٱللَّهُ عَلَىَّ إِذْ لَمْ أَكُن مَّعَهُمْ شَهِيدًا ۷۲

{72} Kisha akajulisha kuhusu wenye Imani dhaifu, wavivu juu ya Jihadi. Akasema, “Na hakika yupo kati yenu” yani enyi Waumini, “anayejikokota sana.” Yani anaona uzito mkubwa kuhusu kufanya Jihadi katika njia ya Mwenyezi Mungu kwa kujidhoofisha, na kujilegeza, na woga. Hili ndilo sahihi. Na ilisemwa kuwa maana yake ni kwamba wao huwafanya wengine kujikokota. Yani kwa kumkatisha tamaa ya kupigana vita. Na hawa ndio wanafiki. Lakini (maana) ya kwanza ndio inayofaa zaidi kwa sababu mbili: moja yake ni kauli yake, “kati yenu”, na mazungumzo haya ni kwa Waumini. Na ya pili ni kauli yake mwishoni mwa Aya, “kama kwamba hapakuwa mapenzi baina yenu na yeye” kwa maana makafiri miongoni mwa washirikina na wanafiki, Mwenyezi Mungu alikwisha kata mapenzi baina yao na Waumini. Na pia, huu ndio ukweli. Kwani, Waumini wapo aina mbili: wakweli katika imani yao, ambao hilo liliwaletea kusadiki kukamilifu na Jihadi. Na walio dhaifu, waliingia katika Uislamu, kwa hivyo wakawa na imani dhaifu ambayo haikuwa na nguvu juu ya Jihadi. Kama alivyosema Yeye Mtukufu, “Mabedui walisema: Tumeamini. Sema: Hamjaamini, lakini semeni: Tumesilimu...” hadi mwisho wa Aya hizi. Kisha akataja malengo ya hawa wanaozembea na mwisho wa malengo yao, na kwamba lengo lao kubwa ni dunia na mapambo yake. Kwa hivyo, akasema, “Na ukiwapata msiba,” yani kushindwa, na kuuawa, na maadui wakawapiku katika baadhi ya hali kwa sababu ya hekima ya Mwenyezi Mungu katika hilo, “anasema” huyo mwenye kubaki nyuma; “Hakika Mwenyezi Mungu amenineemesha kwa vile sikuwa nimehudhuria pamoja nao.” Aliona kutokana na udhaifu wa akili yake na imani yake kwamba kukaa nyuma ya Jihadi ambayo ina msiba huo ni neema. Lakini hakutambua kwamba neema ya kihakika ni kuwezeshwa juu ya utiifu huu mkubwa ambao kwao imani inaimarika, na mja anasalimika kutokana na adhabu na hasara. Na ndani yake anapata thawabu kubwa na ridhaa ya Mkarimu, Mwenye kutunuku. Na ama kukaa, basi hilo hata kama atapumzika kwa muda kidogo, basi hilo linafuatwa na taabu ndefu, na maumivu makubwa, na yanamkosa yale yanayowapata wanaopigana Jihadi.