Al-Baqara

شَهْرُ رَمَضَانَ ٱلَّذِىٓ أُنزِلَ فِيهِ ٱلْقُرْءَانُ هُدًى لِّلنَّاسِ وَبَيِّنَـٰتٍ مِّنَ ٱلْهُدَىٰ وَٱلْفُرْقَانِ ۚ فَمَن شَهِدَ مِنكُمُ ٱلشَّهْرَ فَلْيَصُمْهُ ۖ وَمَن كَانَ مَرِيضًا أَوْ عَلَىٰ سَفَرٍ فَعِدَّةٌ مِّنْ أَيَّامٍ أُخَرَ ۗ يُرِيدُ ٱللَّهُ بِكُمُ ٱلْيُسْرَ وَلَا يُرِيدُ بِكُمُ ٱلْعُسْرَ وَلِتُكْمِلُوا۟ ٱلْعِدَّةَ وَلِتُكَبِّرُوا۟ ٱللَّهَ عَلَىٰ مَا هَدَىٰكُمْ وَلَعَلَّكُمْ تَشْكُرُونَ ۱۸۵

{185} “Mwezi wa Ramadhani ndio ambao imeteremshwa Qur-ani ndani yake.” Yani maana Saumu iliyofaradhishwa juu yenu ni ya mwezi wa Ramadhani. Mwezi mtukufu ambao ndani yake mlipata fadhila kubwa sana kutoka kwa Mwenyezi Mungu. Nayo ni Qur-ani Tukufu, ambayo inajumuisha uwongofu kwa masilahi yenu ya kidini na kidunia, na kubainisha haki kwa njia iliyo wazi zaidi. Na upambanuzi kati ya haki na batili, uwongofu na upotofu, na watu wa furaha (waliobahatika) na watu wa mashakani (waliohasirika). Kwa hivyo, haishangazi kwamba mwezi ambao hizi ndizo fadhila zake, na hii ihsani ya Mwenyezi Mungu juu yenu ndani yake, uwe ndio msimu wa ibada; ambao kufunga Saumu kumefaradhishwa ndani yake. Na alipothibitisha hilo, na akabainisha fadhila zake, na hekima ya Mwenyezi Mungu Mtukufu katika kuuteua, akasema: “Kwa hivyo, atakayeushuhudia mwezi miongoni mwenu, basi na afunge”. Na aya hii ndani yake kuna kuifanya kufunga Saumu kuwa jambo mahususi kwa mwenye uwezo, aliye sahihi, ambaye si msafiri. Na kwa vile sheria ya hiari ya kati ya kufunga kufidia ilipofutwa hasa, alirudia ruhusa ile ya mgonjwa na msafiri kutofunga, ili asifikiriwe kwamba ruhusa hiyo pia ilifutwa. [Akasema]: “Mwenyezi Mungu anawatakia yaliyo mepesi, wala hawatakii yaliyo mazito.” Yani Mwenyezi Mungu Mtukufu anataka kuwasahilishieni njia zifikishazo kwenye radhi zake kwa wepesi mkubwa zaidi, na azifanye kuwa nyepesi mno. Ndiyo maana yote ambayo Mwenyezi Mungu aliwaamrisha waja wake yalikuwa rahisi mno katika asili yake. Na ikiwa kutatokea baadhi ya vizuizi vyenye kusababisha uzito ndani yake, basi Yeye huzirahisisha ibada kurahisisha kwingine. Ima kwa kuitupilia mbali, au kuipunguza kwa aina za kupunguza. Hii ni sentensi haiwezi kufafanuliwa ikaisha, kwa sababu maelezo yake yote ndiyo sheria zote, na zinaingia humo ruhusa zote, na upunguzaji wote. “Na ili mkamilishe hesabu hiyo.” Na hili, - na Mwenyezi Mungu ndiye ajuaye zaidi – ili mwenye kufikiria fikira potovu asije akafirikia kwamba kufunga Saumu ya Ramadhani yanatimia makusudio yake kwa kufunga baadhi yake tu. Akazuia fikra hiyo potovu kwa kumwamrisha akamilishe hesabu ya siku zake. Na amshukuru Mwenyezi Mungu Mtukufu baada ya kukamilika kwake kwa ajili ya kumwezesha kwake, na kusahilisha kwake, na kubainisha kwake kwa waja wake; na kwa kufanya takbira mwisho wake. Na inaingia katika hilo kufanya takbira wakati wa kuuona mwezi mwandamo wa Shawwal hadi mwisho wa khutba ya Idi.