Al-Ahzaab

يَـٰٓأَيُّهَا ٱلَّذِينَ ءَامَنُوا۟ لَا تَدْخُلُوا۟ بُيُوتَ ٱلنَّبِىِّ إِلَّآ أَن يُؤْذَنَ لَكُمْ إِلَىٰ طَعَامٍ غَيْرَ نَـٰظِرِينَ إِنَىٰهُ وَلَـٰكِنْ إِذَا دُعِيتُمْ فَٱدْخُلُوا۟ فَإِذَا طَعِمْتُمْ فَٱنتَشِرُوا۟ وَلَا مُسْتَـْٔنِسِينَ لِحَدِيثٍ ۚ إِنَّ ذَٰلِكُمْ كَانَ يُؤْذِى ٱلنَّبِىَّ فَيَسْتَحْىِۦ مِنكُمْ ۖ وَٱللَّهُ لَا يَسْتَحْىِۦ مِنَ ٱلْحَقِّ ۚ وَإِذَا سَأَلْتُمُوهُنَّ مَتَـٰعًا فَسْـَٔلُوهُنَّ مِن وَرَآءِ حِجَابٍ ۚ ذَٰلِكُمْ أَطْهَرُ لِقُلُوبِكُمْ وَقُلُوبِهِنَّ ۚ وَمَا كَانَ لَكُمْ أَن تُؤْذُوا۟ رَسُولَ ٱللَّهِ وَلَآ أَن تَنكِحُوٓا۟ أَزْوَٰجَهُۥ مِنۢ بَعْدِهِۦٓ أَبَدًا ۚ إِنَّ ذَٰلِكُمْ كَانَ عِندَ ٱللَّهِ عَظِيمًا ৫৩

{53} Mwenyezi Mungu Mtukufu anawaamrisha waja wake waumini kuwa na adabu nzuri mbele ya Mtume wa Mwenyezi Mungu, – rehema na amani za Mwenyezi Mungu ziwe juu yake – wanapoingia majumbani mwake. Kwa hivyo alisema, "Enyi mlio amini, msiingie nyumba za Nabii isipokuwa mpewe ruhusa kwenda kula chakula." Yaani, msiingie humo bila ruhusa ya kuingia humo kwa ajili ya kula chakula, na pia "siyo kungojea kiive," au hata kukaa hapo baada ya kula. Maana yake ni kwamba msiingie katika nyumba za Mtume isipokuwa kwa masharti mawili: ikiwa atawaruhusu kuingia, na kwamba kukaa hapo kwenu kuwe kwa kiasi tu inavyohitajika. Na ndiyo maana akasema, "Lakini mtakapoitwa, basi ingieni, na mkishakula tawanyikeni, wala msiweke mazungumzo" kabla ya kula chakula na baada yake. Kisha akabainisha hekima ya katazo hili na faida yake, akasema, "Hakika hayo," yaani, kungoja kwenu kupita kiasi cha haja "yalikuwa yanamuudhi Nabii;" kwani hilo lilikuwa ni vigumu kwake na lenye kumzuia kuendelea na shughuli zake za kinyumbani; "naye anawastahi" na akaona haya kuwaambia: Ondokeni! Kama ilivyo kawaida, watu - hasa watu wakarimu- wanaona haya kuwatoa watu majumbani mwao. "Na" lakini "Mwenyezi Mungu hastahi kwa jambo la haki." Jambo la kisheria, hata ikidhaniwa kuwa kuna tabia njema na staha katika kuliacha, ila azimio kubwa zaidi katika hali hiyo ni kufuata amri ya kisheria, na kwamba aazimie kwa yakini ya kwamba chochote kinachopingana na hilo si tabia njema hata kidogo. Na Mwenyezi Mungu Mtukufu haoni haya kuwaamrisha kufanya yaliyo mema kwenu na kumhurumia Mtume wake, hata kama ni nani. Hii ndiyo adabu yao wanapoingia majumbani mwake, na adabu zao kwake wanapozungumza na wake zake. Hilo ni ikiwa anaihitaji au haihitaji. Ikiwa haihitaji, basi haihitajiki. Na adabu njema katika hali hii ni kuliacha. Na ikiwa linahitajika, kama vile kuwaomba kitu au vyombo vingine vya nyumbani au mfano wake, basi wataulizwa (Wake zake Nabii) "kwa nyuma ya mapazia" kwa sababu hilo halihitaji kuwatazama. Kwa hivyo ikawa kwamba kuwatazama ni jambo lililokatazwa kwa hali yoyote ile, na pia kuwaongelesha kuna sheria zake kama aliyoyataja Mwenyezi Mungu. Kisha akataja hekima ya hayo kwa kusema, "Hivyo ndivyo usafi zaidi kwa nyoyo zenu na nyoyo zao;" kwa sababu hilo liko mbali zaidi na dhana mbaya. Na kila mtu anavyokuwa mbali zaidi na sababu zinazompeleka kwenye maovu, basi hilo linakuwa salama zaidi kwake na safi zaidi kwa moyo wake. Na ndiyo maana miongoni mwa mambo ya sheria ya kisheria ambayo Mwenyezi Mungu aliyabainisha kwa kina zaidi ni kwamba, njia zote na sababu za uovu na matangulizi yake yameharamishwa, na kwamba mtu anapaswa kujiepusha mbali nayo kwa kila njia. Kisha akasema neno lenye kukusanya zaidi na kanuni ya jumla, "Wala haikufaieni" enyi kundi la Waumini na ni kitu kibaya zaidi "kumuudhi Mtume wa Mwenyezi Mungu" kwa maneno au kwa vitendo. "Wala kuwaoa wake zake baada yake kabisa;" kwani hilo ni katika mambo yanayomuudhi. Kwani yeye - rehema na amani za Mwenyezi Mungu ziwe juu yake - ana nafasi ya kupewa tadhima, kuinuliwa, na kuheshimiwa. Na kuwaoa wake zake baada yake ni kutia dosari katika nafasi yake hii. Na pia, ni kwa sababu wao ni wake zake duniani na akhera, na ndoa yao itaendelea kubakia hata baada ya kufa kwake. Kwa hivyo, hairuhusiki kwa yeyote katika umma wake kuwaoa wake zake baada yake. "Hakika jambo hilo ni kubwa mbele ya Mwenyezi Mungu." Na umma huu ulishaitekeleza amri hii na ukaepukana na yale ambayo Mwenyezi Mungu alikataza, na sifa njema ni za Mwenyezi Mungu na shukrani.