Al-An'aam

وَكَذَٰلِكَ فَتَنَّا بَعْضَهُم بِبَعْضٍ لِّيَقُولُوٓا۟ أَهَـٰٓؤُلَآءِ مَنَّ ٱللَّهُ عَلَيْهِم مِّنۢ بَيْنِنَآ ۗ أَلَيْسَ ٱللَّهُ بِأَعْلَمَ بِٱلشَّـٰكِرِينَ 53

{53} "Na hivi ndivyo tunavyowajaribu wao kwa wao, ili waseme: Ni hao ndio Mwenyezi Mungu amewafadhilisha miongoni mwetu?" Yaani, haya ni majaribio ya Mwenyezi Mungu kwa waja wake, alivyowafanya baadhi yao kuwa matajiri, na wengine wao kuwa maskini, na wengine wao kuwa waheshimiwa, na wengine wao kuwa wanyonge. Basi Mwenyezi Mungu akimpa imani masikini au mnyonge, hilo linakuwa jambo la majaribio kwa tajiri na mheshimiwa. Basi ikiwa makusudio yake ni haki na kuifuata, ataamini na kusilimu, na haitamzuia na hilo kushiriki pamoja na yule anayemuona kuwa chini yake kwa mali au heshima.Na ikiwa yeye si mkweli katika kutafuta haki, basi hili linakuwa ni kizuizi kinachomzuia kufuata haki, na wakasema wakiwadharau wale wanaowaona kuwa ni duni kuwaliko wao: "Ni hao ndio Mwenyezi Mungu amewafadhilisha miongoni mwetu?" Kwa hivyo, hili likawazuia kufuata haki kwa sababu ya kukosa kwao kuwa safi. Mwenyezi Mungu akasema katika kujibu maneno yao ambayo yanajumuisha kumpinga Mwenyezi Mungu kuhusiana na kuwaongoa watu hawa na kutowaongoa wao wenyewe: "Kwani Mwenyezi Mungu hawajui wanaoshukuru?" Ambao wanaijua neema na kuikiri na wanatekeleza yale inayoyataka miongoni mwa matendo mema. Basi Yeye Anawapa fadhila zake na neema zake juu yao kando na yule ambaye siyo mwenye kushukuru. Kwani Mwenyezi Mungu Mtukufu ni Mwenye hekima, na haweki fadhila zake kwa yule ambaye hazistahili, na hawa wanaopinga wana sifa hii. kinyume na wale ambao Mwenyezi Mungu amewaneemesha kwa imani miongoni mwa masikini na wengineo. Wao kwa hakika ndio wenye kushukuru.