Ar-Room

وَإِذَآ أَذَقْنَا ٱلنَّاسَ رَحْمَةً فَرِحُوا۟ بِهَا ۖ وَإِن تُصِبْهُمْ سَيِّئَةٌۢ بِمَا قَدَّمَتْ أَيْدِيهِمْ إِذَا هُمْ يَقْنَطُونَ 36 أَوَلَمْ يَرَوْا۟ أَنَّ ٱللَّهَ يَبْسُطُ ٱلرِّزْقَ لِمَن يَشَآءُ وَيَقْدِرُ ۚ إِنَّ فِى ذَٰلِكَ لَـَٔايَـٰتٍ لِّقَوْمٍ يُؤْمِنُونَ 37

{36 - 37} Mwenyezi Mungu Mtukufu anajulisha kuhusu maumbile asili ya watu wengi katika nyakati za mafanikio na shida, kwamba Mwenyezi Mungu anapowaonjesha rehema kutoka kwake, kama vile afya njema, mali, ushindi, na mfano wake; wanayafurahia hayo kwa furaha ya kiburi, si furaha ya shukrani na kujivunia neema ya Mwenyezi Mungu. "Na ukiwasibu ubaya kwa iliyoyatanguliza mikono yao wenyewe," kama vile maasi, "mara wanakata tamaa" ya kuondoka kwa ufukara huo, maradhi na mengineyo. Na huu ndio ujinga wao, na kutojua. "Kwani hawaoni kwamba Mwenyezi Mungu humkunjulia riziki amtakaye na humkunjia amtakaye?" Kwa hivyo, halina mahali popote jambo la kukata tamaa baada ya kujua kwamba heri na shari zinatoka kwa Mwenyezi Mungu na kwamba riziki nyingi na chache ni katika mipango yake. Basi ewe mwenye akili usiangalie sababu za mambo tu, bali yaelekeze macho yako kwa aliyeyasababisha mambo hayo, na ndiyo maana akasema, "Hakika katika hayo zipo Ishara kwa watu wanaoamini." Hao ndio wanaozingatia kwamba Mwenyezi Mungu humkujulia amtakaye na kumkunjia amtakaye, na kwa hayo wanapata kujua hekima ya Mwenyezi Mungu, rehema yake, uwepo wake, na kuivutia mioyo kumwomba Yeye katika mahitaji yote ya riziki.