Maryam

إِذْ نَادَىٰ رَبَّهُۥ نِدَآءً خَفِيًّا 3 قَالَ رَبِّ إِنِّى وَهَنَ ٱلْعَظْمُ مِنِّى وَٱشْتَعَلَ ٱلرَّأْسُ شَيْبًا وَلَمْ أَكُنۢ بِدُعَآئِكَ رَبِّ شَقِيًّا 4

{3 - 4} Alipojiona amedhoofika, na akahofu kwamba atakufa, na hakukuwa na yeyote wa kusimama pahali pake katika kuwalingania viumbe kwa Mola wao Mlezi na kuwapa ushauri mwema, akamlalamikia Mola wake Mlezi juu ya udhaifu wake wa dhahiri na uliofichikana, na akamwita mwito uliofichikana ili awe uwe kamili zaidi, na bora zaidi, na wa kumkusudia Mwenyezi Mungu tu kikamilifu. Akasema, "Mola wangu Mlezi! Hakika mimi, mifupa yangu imedhoofika." Na wakati mifupa ambayo ndiyo nguzo ya mwili inapodhoofika, basi viungo vinginevyo vinadhoofika. "Na kichwa kinametameta kwa mvi" kwa sababu mvi ni ishara ya udhaifu na uzee, na ni mtume wa kifo, na mtangulizi wake, na mwonyaji wake. Kwa hivyo akamwomba Mwenyezi Mungu Mtukufu kwa udhaifu wake na kutoweza kwake. Na hii ni katika njia zinazopendeza zaidi za kumuomba nazo Mwenyezi Mungu. Kwa sababu njia hii inaonyesha kujiweka mbali na uwezo wako na nguvu zako, na kufungamana kwa moyo na uwezo wa Mwenyezi Mungu na nguvu zake. "Wala, Mola wangu Mlezi, sikuwa mwenye bahati mbaya kwa kukuomba Wewe." Kwa hivyo, ewe Mola wangu Mlezi hutakuwa ni wa kuniacha niambulie patupu, wala kuniacha bila ya kuniitikia maombi. Bali hujaacha kuwa mwema kwangu, na kuniitikia dua yangu, na wema wako na ihsani yako haijaacha kuendelea kunifikia kwa mfululizo. Na hii ni njia ya kumuomba Mwenyezi Mungu kwa neema zake juu yake, na kuitikia kwake maombi yake ya awali. Kwa hivyo alimwomba yule ambaye hapo awali alikuwa amemfanyia mema kwamba amkamilishie wema wake katika siku zijazo.