Ar-Ra'd

ٱللَّهُ ٱلَّذِى رَفَعَ ٱلسَّمَـٰوَٰتِ بِغَيْرِ عَمَدٍ تَرَوْنَهَا ۖ ثُمَّ ٱسْتَوَىٰ عَلَى ٱلْعَرْشِ ۖ وَسَخَّرَ ٱلشَّمْسَ وَٱلْقَمَرَ ۖ كُلٌّ يَجْرِى لِأَجَلٍ مُّسَمًّى ۚ يُدَبِّرُ ٱلْأَمْرَ يُفَصِّلُ ٱلْـَٔايَـٰتِ لَعَلَّكُم بِلِقَآءِ رَبِّكُمْ تُوقِنُونَ 2

{2} Yeye Mtukufu anajulisha juu ya upekee wake katika uumbaji, uendeshaji mambo, ukuu, na mamlaka, jambo ambalo linaashiria kwamba Yeye peke yake ndiye anayepaswa kuabudiwa, ambaye haifai kufanya ibada isipokuwa kwa ajili yake tu. Kwa hivyo akasema, “Mwenyezi Mungu ndiye aliyeziinua mbingu” pamoja na ukubwa wake na upana wake, kwa uwezo wake mkubwa, "bila ya nguzo mnazoziona.” Yaani, hazina nguzo zozote kwa chini yake. Kwa maana zingekuwa zina nguzo, basi mngeliziona “kisha” baada ya kuziumba mbingu na ardhi, “akainuka juu ya Kiti cha Enzi” kikubwa, ambacho ndicho kiumbe cha juu zaidi. Aliinuka juu kuinuka kunakolingana na utukufu wake na ukamilifu wake, “na akatiisha jua na mwezi” kwa masilahi ya waja na masilahi ya mifugo yao na matunda yao. "Kila kimoja" yaani jua na mwezi, "kinakwenda" kwa uendeshaji wa Mwenye nguvu, Mwenye kujua yote “kwa muda maalumu,” kwa mwendo uliopangwa, havipumziki, wala havichoki mpaka utakapokuja muda uliowekwa. Ambayo ni muda ule Mwenyezi Mungu ataukunja ulimwengu huu na kuwahamisha hadi kwenye nyumba ya akhera, ambayo ndiyo nyumba ya makazi ya kudumu. Kisha Mwenyezi Mungu atazikunja mbingu na kuzibadilisha, na ataighairi ardhi na kuibadilisha. Nalo jua na mwezi atavikunjakunja, na [kuviunganisha] na vitatupwa ndani ya Moto. Ili wale wanaoviabudu waone kuwa hivyo havistahiki kuabudiwa, kwa hivyo watajuta majuto makubwa zaidi kwa sababu ya hilo, na ile wajue wale waliokufuru kwamba walikuwa waongo. Na kauli yake, “anaendesha mambo, na anazipambanua Ishara kwa kina.” Huku ni kujumuisha kati ya uumbaji na amri. Yaani, Mwenyezi Mungu Mkuu ameinuka juu ya kiti cha ufalme, anaendesha mambo yote ya ulimwengu wa juu na wa chini. Kwa hivyo anaumba na kuruzuku, anatajirisha na kufukarisha, anawanyanyua baadhi ya watu na kuwadunisha wengine, anatukuza na kudhalilisha, anateremsha na kuinua, anakinga kutokana na vikwazo, anaondoa misiba, anatekeleza majaliwa katika nyakati zake ambazo alikwisha jua na kalamu yake ikayaandika; na anawatuma Malaika wake watukufu kuyaendesha yale aliyowafanya kuendesha. Na anateremsha Vitabu vya kiungu kwa Mitume wake, na anabainisha yale wanayohitaji waja wake katika sheria mbalimbali, maamrisho na makatazo, na anayabainisha kwa kina zaidi na kuyapambanua. "ili" kwa sababu ya yale aliyowatolewa miongoni mwa ishara mbalimbali za kiupeo na ishara za kiqur-ani, "mpate kuwa na yakini ya kukutana na Mola wenu Mlezi.” Kwa maana, wingi wa ushahidi, na ubainifu wake na kuwa kwake wazi ni katika sababu za kupata yakini katika mambo yote ya kimungu, hasa katika itikadi kuu, kama vile ufufuo, na kupelekwa mahali pa hesabu, na kutolewa makaburini. Na pia, inajulikana kuwa Mwenyezi Mungu ni Mwenye hekima. Yeye haumbi viumbe bure, wala haviachi bure. Kama vile alivyowatuma Mitume wake na akateremsha vitabu vyake kuamrisha na kuwakataza waja wake, basi ni lazima atawahamisha hadi katika nyumba ambayo kuna malipo yao, ili awalipe wafanyao mazuri kwa malipo mazuri zaidi, na awalipe wafanyao mabaya kwa ubaya wao.