Yusuf

فَلَمَّا سَمِعَتْ بِمَكْرِهِنَّ أَرْسَلَتْ إِلَيْهِنَّ وَأَعْتَدَتْ لَهُنَّ مُتَّكَـًٔا وَءَاتَتْ كُلَّ وَٰحِدَةٍ مِّنْهُنَّ سِكِّينًا وَقَالَتِ ٱخْرُجْ عَلَيْهِنَّ ۖ فَلَمَّا رَأَيْنَهُۥٓ أَكْبَرْنَهُۥ وَقَطَّعْنَ أَيْدِيَهُنَّ وَقُلْنَ حَـٰشَ لِلَّهِ مَا هَـٰذَا بَشَرًا إِنْ هَـٰذَآ إِلَّا مَلَكٌ كَرِيمٌ 31

{31} Na kauli hii kwa upande wao ilikuwa ni njama, na haikukusudiwa tu kumlaumu na kumkashifu, bali walitaka, kwa maneno haya, kufikia kumuona huyu Yusuf, ambaye naye mke wa mheshimiwa huyu alifitinishwa naye ili mke wa mheshimiwa huyu akasirike na awaonyeshe ili wamkubalie udhuru wake. Na ndiyo maana wakaiita njama, kwa hivyo akasema: "Basi aliposikia yule bibi masengenyo yao, aliwaita" yaani aliwaita nyumbani kwake kwa ajili ya karamu, "na akawawekea matakia ya kuegemea." Yaani, pahali palipoandaliwa kwa kila aina ya magodoro, mito, na vyakula vitamu. Na miongoni mwa vitu alivyoleta katika karamu hiyo ni chakula kilichohitaji kisu. Ima tunda la utruj au kitu kinginecho. "Na akampa kila mmoja wao kisu" ili wakate kwacho chakula hicho, "na akamwambia" Yusuf, "Tokeza mbele yao," katika hali ya uzuri wake na urembo wake. "Basi walipomwona, waliona ni kitu kikubwa kabisa" katika vifua vyao na wakaona mandhari ya ajabu mno ambayo hawakuwahi kuona mfano wake. "Na wakajikatakata mikono yao" kwa sababu ya mshango kwa visu hivyo walivyokuwa navyo. "Wakasema: Hasha Lillahi!' Yaani, wakamtakasa Mwenyezi Mungu, "Huyu si mwanadamu. Huyu si isipokuwa Malaika mtukufu." Na hayo ni kwa sababu Yusuf alipewa uzuri wa ajabu mno, na nuru na urembo ambayo kwayo alikuwa ni ishara kwa watazamaji na mazingatia kwa wanaotafakari.