Yunus

إِنَّ ٱلَّذِينَ لَا يَرْجُونَ لِقَآءَنَا وَرَضُوا۟ بِٱلْحَيَوٰةِ ٱلدُّنْيَا وَٱطْمَأَنُّوا۟ بِهَا وَٱلَّذِينَ هُمْ عَنْ ءَايَـٰتِنَا غَـٰفِلُونَ 7

{7} Yeye Mtukufu Anasema, "Hakika wale wasiotaraji kukutana nasi;” yaani, hawataki kukutana na Mwenyezi Mungu ambaye ndiye mkubwa zaidi ambaye watamanio wanatamani, na wa juu zaidi anayetumainiwa na wanaotumaini. Lakini wao walilipa mgongo, na hata huenda walilikadhibisha “na wakaridhia uhai wa dunia hii” badala ya Akhera, "na wakatua nao.” Yaani, waliyategemea, na wakayafanya kuwa ndio lengo la jambo lao na mwisho wa makusudio yao. Basi wakayatafuta kwa bidii, na wakashikana na starehe zake na matamanio yake, na wakazitafuta kwa njia yoyote ile ziwezavyo kupatikana, na kwa upande wowote ule zinapoonekania, wanaziendea haraka. Walielekeza matashi yao, na nia zao, na fikira zao, na matendo yao kwazo. Basi ni kana kwamba waliumbwa kubaki humo, na ni kana kwamba si nyumba ya kupitia tu ndani yake, ambayo wasafiri wanachukua humo masurufu kwa ajili ya nyumba ya milele ambayo humo ndiko wataenda wa mwanzo na wa mwisho, na ambayo kwa ajili ya neema zake na starehe walijiandaa wale waliofanikishwa "na wale walioghafilika na Ishara zetu.” Kwa hivyo hawafaidiki na ishara za kiqur-aani wala ishara za kiupeo na kinafsi. Na kuupa ushahidi mgongo kunalazimu kukipa mgongo na kughafilika na kile kinachoashiriwa, na kinachokusudiwa.