Al-A'raaf

فَتَوَلَّىٰ عَنْهُمْ وَقَالَ يَـٰقَوْمِ لَقَدْ أَبْلَغْتُكُمْ رِسَالَةَ رَبِّى وَنَصَحْتُ لَكُمْ وَلَـٰكِن لَّا تُحِبُّونَ ٱلنَّـٰصِحِينَ 79

{79} "Basi akawaacha" Swaleh, amani iwe juu yake, wakati Mwenyezi Mungu alipofikishia adhibu, "na akasema" akiwaambia kwa kuwakaripia, na kuwalaumu baada ya Mwenyezi Mungu kuwaangamiza. "Enyi kaumu yangu! Hakika, niliwafikishia ujumbe wa Mola wangu Mlezi, na nikawanasihi." Yaani, yote aliyonituma nayo kwenu Mwenyezi Mungu nimekwisha wafikishia, na nimefanya hima kuwaongoa, na nimejitahidi kuwafanya mfuate Njia iliyonyooka na Dini iliyonyooka sawa; "lakini nyinyi hamuwapendi wenye kunasihi." Bali mliyakataa maneno ya wenye kunasihi, na mkamtii kila shetani aliyefukuziliwa mbali. Na jua kwamba wengi wa wafasiri wanataja katika kisa hiki kwamba ngamia jike yule alitoka kwenye jiwe imara, laini walilompendekezea Swaleh, na kwamba lilipata machungu kama machungu ya mwanamke mjamzito; basi ngamia jike huyo akatoka hali ya kuwa wanatazama. Na kwamba alikuwa na mwana ngamia mdogo wakati walipomchinja, aliyelia milio tatu na mlima ukampasukia na akaingia humo. Na kwamba Swaleh, amani iwe juu yake, aliwaambia: "Ishara ya kuwateremkia adhabu ni kwamba mtaamka katika siku ya kwanza miongoni mwa zile siku tatu hali ya kuwa nyuso zenu ni za njano, na siku ya pili ni nyekundu, na siku ya tatu ni nyeusi.” Basi ikawa kama alivyosema. Na hayo ni miongoni mwa hadithi za Banu Israili ambazo haifai kuzinukuu katika kukitafasiri Kitabu cha Mwenyezi Mungu, na hakuna katika Qur-ani kinachoashiria chochote katika hayo kwa njia yoyote ile. Bali lau kuwa zingekuwa sahihi, basi Mwenyezi Mungu Mtukufu angezitaja, kwa sababu ndani yake kuna maajabu, na mazingatio, na Ishara mbalimbali Mwenyezi Mungu hawezi kuzipuuza, na kuacha kuzitaja mpaka zije kutokea kwa njia ya yule asiyeaminika katika kunukuu kwake. Bali Qur-aani inakadhibisha baadhi ya haya yaliyotajwa. Kwani Swaleh aliwaambia, “Jifurahisheni katika nyumba zenu siku tatu.” Yaani, furahieni na stareheni kwa wakati huu mfupi sana. Kwani, nyinyi hamna starehe wala kujifurahisha isipokuwa haya. Na ni furaha gani na starehe kwa wale ambao Nabii wao aliwaahidi kutokea kwa adhabu na akawatajia kutokea kwa vitangulizi vyake, kwa hivyo vikatokea siku baada ya siku kwa namna inayowajumlisha na kuwaenea; kwa sababu, wekundu wa nyuso zao, na umanjano wake, na weusi wake ni katika adhabu? Je, hili si isipokuwa lipinganalo na Qur-aani na kinyume chake? Kwani Qur-ani ina utoshelevu na mwongozo juu ya kila kitu kinginecho. Ndiyo, lau kuwa kulikuwepo na jambo lililo sahihi kutoka kwa Mtume wa Mwenyezi Mungu – rehema na amani ziwe juu yake – ambalo halipingani na Kitabu cha Mwenyezi Mungu, basi kwa kichwa na jicho tunalikubali. Nayo ni katika yale ambayo Qur-ani ilituamrisha kufuata, “Na anachowapa Mtume, basi kichukueni. Na anachowakataza, basi komekeni." Na tayari imeshatangulia kwamba hairuhusiki kukitafsiri Kitabu cha Mwenyezi Mungu kwa kutegemea habari za Banu Israili, hata kama ni kwa rai inayoruhusu kusimulia kutoka kwao mambo ambayo hayajathibitishwa kuwa ni ya uongo. Kwa sababu, maana za Kitabu cha Mwenyezi Mungu ni ya hakika, na hayo ni mambo ambayo hayawezi kusadikiwa wala kukadhibishwa. Basi viwili hivyo haviwezi kufikiana.