Al-A'raaf

وَلَقَدْ ذَرَأْنَا لِجَهَنَّمَ كَثِيرًا مِّنَ ٱلْجِنِّ وَٱلْإِنسِ ۖ لَهُمْ قُلُوبٌ لَّا يَفْقَهُونَ بِهَا وَلَهُمْ أَعْيُنٌ لَّا يُبْصِرُونَ بِهَا وَلَهُمْ ءَاذَانٌ لَّا يَسْمَعُونَ بِهَآ ۚ أُو۟لَـٰٓئِكَ كَٱلْأَنْعَـٰمِ بَلْ هُمْ أَضَلُّ ۚ أُو۟لَـٰٓئِكَ هُمُ ٱلْغَـٰفِلُونَ ۱۷۹

{179} Yeye Mtukufu anasema, akibainisha wingi wale waliokengeuka, waliopotea, waliomfuata Shetani aliyelaaniwa: "Na hakika tumeiumbia" tulianzisha, na kueneza "Jahannamu wengi katika majini na watu" ambao wanyama wa mifugo wamekuwa katika hali bora zaidi kuwaliko wao. "Wana nyoyo wasizofahamu kwazo;" yaani, hazifikiwi na ufahamu wala elimu isipokuwa kwa kuwasimamishia hoja tu. "Na wana macho wasiyoona kwayo" yenye kuwanufaisha. Bali wamepoteza manufaa yake na faida yake, "Na wana masikio wasiyosikia kwayo" kusikia kunakoifikia maana yake mioyo yao. "Hao" wenye sifa hizi mbaya "ni kama wanyama wa mifugo." Yaani, wanyama ambao walipoteza akili. Na hawa walipendelea yenye kuisha badala ya yenye kubaki, kwa hivyo wakawa wamenyang’anywa sifa ya kuwa na akili. "Bali wao ni wapotofu zaidi" kuliko wanyama. Kwa sababu, wanyama wa mifugo wanatumiwa katika yale waliyoumbwa kwa ajili yake; nao wana bongo wanazotambua kwazo yenye kuwadhuru kando na yenye kuwanufaisha. Na ndiyo maana wakawa katika hali bora zaidi kuliko wao. Na "hao ndio walioghafilika'" ambao walivighafilikia vitu vyenye faida zaidi. Walighafilikia kumwamini Mwenyezi Mungu, na kumtii, na kumkumbuka. Waliumbiwa mioyo, na kusikia, na kuona ili viwe msaada kwao katika kutekeleza maamrisho ya Mwenyezi Mungu na haki zake. Lakini wakazitumia kama msaada katika kinyume cha makusudio haya. Basi hawa wanastahiki zaidi kwamba wawe miongoni mwa wale aliowaandalia Mwenyezi mungu Jahannam na akawaumba kwa ajili yake. Kwa hivyo, aliwaumba kwa ajili ya Moto na kwa matendo ya watu wake wanaoyafanya. Na ama mwenye kuvitumia viungo hivi katika kumwabudu Mwenyezi Mungu, na moyo wake ukajipaka rangi ya kumwamini Mwenyezi Mungu na kumpenda na wala hakumghafilikia Mwenyezi Mungu, basi hao ndio watu wa Pepo, na kwa vitendo vya watu wa Pepo wanavifanya.