Al-Baqara

ٱللَّهُ لَآ إِلَـٰهَ إِلَّا هُوَ ٱلْحَىُّ ٱلْقَيُّومُ ۚ لَا تَأْخُذُهُۥ سِنَةٌ وَلَا نَوْمٌ ۚ لَّهُۥ مَا فِى ٱلسَّمَـٰوَٰتِ وَمَا فِى ٱلْأَرْضِ ۗ مَن ذَا ٱلَّذِى يَشْفَعُ عِندَهُۥٓ إِلَّا بِإِذْنِهِۦ ۚ يَعْلَمُ مَا بَيْنَ أَيْدِيهِمْ وَمَا خَلْفَهُمْ ۖ وَلَا يُحِيطُونَ بِشَىْءٍ مِّنْ عِلْمِهِۦٓ إِلَّا بِمَا شَآءَ ۚ وَسِعَ كُرْسِيُّهُ ٱلسَّمَـٰوَٰتِ وَٱلْأَرْضَ ۖ وَلَا يَـُٔودُهُۥ حِفْظُهُمَا ۚ وَهُوَ ٱلْعَلِىُّ ٱلْعَظِيمُ ۲۵۵

{255} Alisema (Mtume) rehema na amani za Mwenyezi Mungu ziwe juu yake kwamba, Aya hii ndiyo kubwa zaidi katika Aya za Qur-ani. Kwa sababu ya kile ilichojumuisha cha maana ya Tauhidi, ukubwa, na wingi wa sifa za Al-Bari (Muumba mwanzilishi) Mtukufu. Alisema kuwa yeye ni "Allah (Mwenyezi Mungu)" ambaye ana maana zote za uungu. Na kwamba hakuna anayestahiki uungu na ibada isipokuwa Yeye tu. Kwani, uungu wa asiyekuwa Yeye na ibada ya asiyekuwa Yeye ni batili, na kwamba yeye ndiye "Al-Hayyu (Aliye hai)." Ambaye ana maana zote za uhai mkamilifu kama vile kusikia, kuona, nguvu, kutaka (mapenzi), na sifa nyinginezo miongoni mwa sifa za kibinafsi. Kama vile "Al-Qayyum (Msimamia mambo yote)" ambayo zinaingia ndani yake Sifa zote za kimatendo. Kwa sababu Yeye ndiye Msimamizi ambaye anajisimamia mwenyewe bila ya kuvihitaji viumbe vyake vyote. Na alivisimamia vyote vinavyopatikana kwani aliviumba vyote, na akavifanya kuendelea kuwepo. Na akavipa kila vinachohitaji kwa ajili ya kuwepo kwake na kuendelea kwake kuishi. Na katika ukamilifu wa uhai wake na Usimamizi wake ni kwamba "hashikwi na kusinzia wala kulala". Kwa sababu, kusinzia na kulala huwa vinampata kiumbe ambaye amepatwa na udhaifu, kutoweza na kuharibika. Na wala havimpati yule mwenye Ukuu, Ukubwa, na Utukufu. Na katika ukamilifu wa ufalme wake ni kwamba "hafanyi uombezi mbele yake" yeyote "isipokuwa kwa idhini yake". Kila wenye heshima, na waombezi wote ni waja wake, na wanamilikiwa na wala hawajitokezi kufanya uombezi mpaka awape idhini. "Sema: Uombezi wote uko kwa Mwenyezi Mungu. Ni wake Yeye tu ufalme wa mbingu na ardhi." Na Mwenyezi Mungu hamruhusu yeyote kufanya uombezi isipokuwa kwa anayemridhia. Na wala haridhii isipokuwa kumpwekesha na kuwafuata Mitume wake. Kwa hivyo, asiyesifika kwa haya, basi hana fungu lolote katika uombezi. Kisha akajulisha kuhusu elimu yake pana inayoenea, na kwamba anayajua yaliyo mbele ya viumbe ya mambo yajayo ambayo hayana mwisho. “Na yaliyo nyuma yao” katika mambo yaliyopita ambayo hayana mpaka, na kwamba haifichiki siri yoyote kwake. “Anajua hiyana ya macho na vinavyoficha vifua.” Na kwamba, yeyote katika viumbe hajui vyema chochote katika elimu ya Mwenyezi Mungu na habari zake. “Isipokuwa kwa kile atakacho” katika hayo. Nayo ni yale aliyowafahamisha katika mambo ya kisheria na ya majaaliwa. Nayo ni sehemu ndogo sana ya elimu yenye kuisha (kwa viumbe) katika elimu za Al-Bari (Muumba mwanzilishi) na habari zake. Na kama walivyosema wenye kumjua zaidi kati ya viumbe, ambao ni Mitume na Malaika; “Subhanaka (Wewe umetakasika)! Hatuna elimu isipokuwa kile ulichotufunza”. Kisha akajulisha kuhusu ukuu wake na utukufu wake, na kwamba Kursi yake imeenea mbingu na ardhi. Na kwamba amehifadhi vyote viwili na vilivyomo miongoni mwa walimwengu kwa njia (sababu) na mifumo ambayo Mwenyezi Mungu aliweka katika viumbe. Hata hivyo, halemewi, yani haimuwii vigumu kuvihifadhi vyote viwili kwa sababu ya ukamilifu wa ukuu wake, uwezo wake, na upana wa hekima yake katika hukumu zake. “Na Yeye ndiye aliye juu zaidi” kwa dhati yake juu ya viumbe vyake. Naye ndiye aliye juu zaidi kwa ukuu wa sifa zake. Naye ndiye aliye juu zaidi ambaye amevishinda nguvu viumbe, na vyote vilivyo chini ya hukumu yake, na magumu yote yamenyenyekea, na shingo zote zimemdhalilikia. “Mkuu” aliyekusanya sifa zote za ukuu, ukubwa, utukufu, uzuri ambaye anapendwa na nyoyo, na roho zinamtukuza. Na wale wanaojua wanajua kwamba ukuu wa kila kitu, hata ukiwa mkuu vipi kwa sababu ya sifa zake, basi huo hupunguka kwa kulinganisha na ukuu wa Al-‘Ali (Mtukufu), Al-‘Adhim (Mkuu). Ni Aya iliyojumuisha maana hizi ambazo ni katika maana tukufu zaidi ina haki ya kuwa kubwa zaidi katika Aya za Qur-ani. Na mwenye kuisoma kwa kutafakari na kuelewa anayo haki ya moyo wake kujaa yakini na shukran na imani, na kwamba ahifadhiwe kwa hayo kutokana na shari ya Shetani.