Ar-Ra'd

يَمْحُوا۟ ٱللَّهُ مَا يَشَآءُ وَيُثْبِتُ ۖ وَعِندَهُۥٓ أُمُّ ٱلْكِتَـٰبِ ۳۹

{39} "Mwenyezi Mungu hufuta ayatakayo" katika hukumu na majaliwa, "na huthibitisha" atakayo katika hayo. Na kufuta huku na kubadilisha huku si katika yale aliyotangulia kuyajua na ikayaandika kalamu yake. Hayo hayaingiwi na mabadiliko wala mageuzi, kwa sababu hilo haliwezekani kwa Mwenyezi Mungu kutokea upungufu wowote wala dosari katika elimu yake. Na ndiyo maana akasema: "Na asili ya hukumu zote zilizoandikwa iko kwake." Yaani, ubao uliohifadhiwa ambao vitu vyote vinaurudia kwa maana huo ndio asili yake, nayo ni matawi yake na vipengele. Kwa hivyo, mageuzi na mabadiliko hutokea katika matawi na vipengele, kama vile matendo ya mchana na usiku ambayo Malaika huyaandika na Mwenyezi Mungu anawekea kuthibiti kwake sababu mbalimbali, na kufutwa kwake pia anakuwekea sababu mbalimbali pia, na sababu hizi hazizidi yale yaliyoandikwa katika Ubao Uliohifadhiwa. Kama vile Mwenyezi Mungu alivyofanya wema, kuunga jamaa, na ukarimu kuwa miongoni mwa njia za kurefusha umri na upana wa riziki, kama vile pia alivyofanya maasia kuwa sababu ya kuondoa baraka ya riziki na umri, na kama vile alivyofanya njia za kuokoka kutokana na maangamivu na maafa kuwa ndizo sababu za usalama; na akafanya kujitia katika hayo ndiyo sababu ya maafa. Basi Yeye ndiye anayeendesha mambo kulingana na uwezo wake na utashi wake. Na kile anachokiendesha miongoni mwa mambo hayahalifu yale aliyokwisha yajua na kuyaandika katika Ubao Uliohifadhiwa.