الجن

لِّيَعْلَمَ أَن قَدْ أَبْلَغُوا۟ رِسَـٰلَـٰتِ رَبِّهِمْ وَأَحَاطَ بِمَا لَدَيْهِمْ وَأَحْصَىٰ كُلَّ شَىْءٍ عَدَدًۢا ٢٨

{28} "Ili Yeye ajue" kwa hayo "kwamba wao wamefikisha ujumbe wa Mola wao Mlezi" na kwa njia ya visababu alivyowawekea. "Na Yeye anayajua vyema yote waliyo nayo" miongoni mwa yale waliyokuwa wakiyaficha na yale waliyoyaweka hadharani. "Na amedhibiti idadi ya kila kitu."

Kuna faida nyingi katika sura hii: Miongoni mwake ni kuwepo kwa majini, na kwamba wamejukumishwa na sheria; waamrishwa na wamekatazwa na watalipwa kwa matendo yao, kama ilivyoelezwa wazi katika Sura hii na nyinginezo. Na miongoni mwake ni kwamba Mtume wa Mwenyezi Mungu – rehema na amani za Mwenyezi Mungu ziwe juu yake – alitumwa kwa majini kama vile alivyotumwa kwa wanadamu. Kwani Mwenyezi Mungu Mtukufu alituma kundi la majini kumwendea ili wasikilize yale yanayoteremshwa kwake ili wawafikishie hayo watu wao. Na miongoni mwake ni akili nzuri ya majini na kujua kwao haki, na kwamba kile kilichowapelekea kuamini ni yale waliyokuwa na uhakika nayo ya uwongofu uliopo katika Qur-ani na tabia zao njema katika usemi wao. Na miongoni mwake ni utunzaji wa Mwenyezi Mungu kwa Mtume wake na kuhifadhi kwake yale aliyokuja nayo. Kwa maana, zilipoanza dalili za unabii wake, mbingu zikalindwa na vimondo, na mashetani wakakimbia kutoka mahali pao huko, na wakafadhaika wakatoka katika mahali walipokuwa wakiskizia habari za mbinguni, na kwamba Mwenyezi Mungu aliwarehemu kwaye wakazi wa ardhi kwa rehema isiyo na kipimo, na Mola wao Mlezi akawatakia uwongofu. Kwa hivyo akataka kudhihirisha katika dini yake, sheria yake na elimu yake katika ardhi yale ambayo nyoyo zitapata bashasha, na wafurahi kwayo wenye akili nzuri, na zidhihirike kwayo alama za Kiislamu, na wakomeke kwayo wana masanamu na vyote viabudiwavyo badala ya Mwenyezi Mungu. Na miongoni mwake ni shauku kubwa ya majini katika kumsikiliza Mtume – rehema na amani za Mwenyezi Mungu ziwe juu yake – na kukusanyika kwao kando yake. Na miongoni mwake ni kwamba Sura hii ilijumuisha amri ya kumpwekesha Mwenyezi Mungu na kukataza ushirikina, na ikabainisha hali ya viumbe, na kwamba kila mmoja wao hastahiki uzito wa chembe wa kuabudiwa. Kwa sababu ikiwa Mtume Muhammad -rehema na amani za Mwenyezi Mungu zimshukie - hana uwezo wa kumnufaisha wala kumdhuru yeyote, na hata hana uwezo kwa ajili yake mwenyewe, basi anajulikana kwamba viumbe vyote viko hivi. Kwa hivyo ni makosa na dhuluma kumfanya yule mwenye maelezo haya kuwa mungu mwingine. Na miongoni mwake ni kwamba elimu ya ghaibu anaijua Mwenyezi Mungu tu. Hakuna yeyote miongoni mwa viumbe anayeijua. Isipokuwa yule ambaye Mwenyezi Mungu amemridhia na akamchagua kujua baadhi yake.

Imekamilika tafsiri ya sura hii, na sifa njema zote ni za Mwenyezi Mungu, Mola Mlezi wa walimwengu wote.