العنكبوت

وَمَا هَـٰذِهِ ٱلْحَيَوٰةُ ٱلدُّنْيَآ إِلَّا لَهْوٌ وَلَعِبٌ ۚ وَإِنَّ ٱلدَّارَ ٱلْـَٔاخِرَةَ لَهِىَ ٱلْحَيَوَانُ ۚ لَوْ كَانُوا۟ يَعْلَمُونَ ٦٤

{64} Mwenyezi Mungu Mtukufu anajulisha juu ya hali ya dunia na Akhera, kwa njia ambayo ndani yake kuna kukatisha tamaa na juu ya dunia hii, na kutia moyo juu ya akhera. Alisema, "Na haya maisha ya dunia" kwa uhakika "si chochote isipokuwa ni pumbao na mchezo" mioyo huyafurahia na miili inayachezea, kwa sababu ya kile ambacho Mwenyezi Mungu aliweka ndani yake cha mapambo, ladha, na matamanio ambayo yanaoneka kwamba ni mazuri kwa mioyo iliyopeana mgongo, ambayo ni marembo kwa macho yaliyoghafilika, yenye kufurahisha roho za wana batili, kisha yanaondoka haraka na kuisha kabisa, mwenye kuyapenda akawa hajapata kwayo isipokuwa majuto, huzuni, na hasara. Ama nyumba ya Akhera, hiyo ndiyo nyumba ya "maisha hasa," ambayo inalazimu kwamba miili ya watu wake ni yenye nguvu sana, ambayo imeumbwa kwa ajili ya uzima, na kwamba ina kila kitu ambacho kinaufanya uhai kuwa kamili, na raha yake inakuwa kamilifu kwa mambo yanayofurahisha mioyo na ya yale yanayotamaniwa na miili kama vile vyakula, vinywaji, ndoa, na mengineyo miongoni mwa mambo ambayo jicho halijawahi kuona, wala hakuna sikio lililowahi kusikia, wala hayajawahi kupita katika moyo wa mwanadamu yeyote. "Laiti wangelikuwa wanajua," basi wasingelipendelea dunia kuliko Akhera. Na kama wangelikuwa wanatumia akili, basi wasingelipenda nyumba ya pumbao na mchezo na wakaacha nyumba ya uhai halisi. Kwa hivyo, hilo likaashiria kwamba wale wanaojua ni lazima waipenedlee Akhera kuliko dunia, kwa sababu wanajua hali halisi za nyumba mbili hizi.